Chapter 4 No.4

Comment dame Oyseuse feist tant 532

Qu'elle ouvrit la porte a l'amant.

Assez i feri et boutai,

Et par maintes fois escoutai

Se j'orroie venir nulle arme.

Le guichet, qui estoit de charme,

M'ovrit une noble pucele

Qui moult estoit et gente et bele.

Cheveus ot blons cum uns bacins[14],

La char plus tendre qu'uns pocins,

Front reluisant, sorcis votis,

Son entr'oil ne fu pas petis[15],

Ains iert assez grans par mesure;

Le nés ot bien fait à droiture,

Les yex ot plus vairs c'uns faucons[16],

Por faire envie à ces bricons.

Douce alene ot et savorée,

La face blanche et colorée,

La bouche petite et grocete,

S'ot où menton une fossete:

Le col fu de bonne moison,

Gros assez et lons par raison,

Si n'i ot bube ne malen,

N'avoit jusqu'en Jherusalen

Fame qui plus biau col portast,

Polis iert et soef au tast.

La gorgete ot autresi blanche

Cum est la noif desus la branche

Quant il a freschement negié.

Le cors ot bien fait et dougié,

[p.37]