Chapter 2 No.2

Aro veici qu'es pas de crèire.

Ancian tèms, nous dison li rèire,

Un jour d'ivèr; la fam te prenguè. Lou front bas

E d'escoundoun anères vèire,

Dins si grand magasin, la fournigo, eilàbas.

L'endrudido au soulèu secavo,

Avans de lis escoundre en cavo,

Si blad qu'aviè mousi l'eigagno de la niue.

Quand èron lest lis ensacavo.

Tu survènes alor, emé de plour is iue.

Iè disés: "Fai bèn fre; l'aurasso

D'un caire à l'autre me tirasso

Avanido de fam. A toun riche mouloun

Leisso-me prène pèr ma biasso.

Te lou rendrai segur au bèu tèms di meloun.

"Presto-me un pan de gran." Mai, bouto,

Se cresès que l'autro t'escouto,

T'enganes. Di gros sa, rèn de rèn sara tièu.

"Vai-t'en plus liuen rascla de bouto;

Crebo de fam l'ivèr, tu que cantes l'estièu."

Ansin charro la fablo antico

Pèr nous counséia la pratico

Di sarro-piastro, urous de nousa li cordoun

De si bourso.-Que la coulico

Rousiguè la tripaio en aqueli coudoun!

Me fai susa, lou fabulisto,

Quand dis que l'ivèr vas en quisto

De mousco, verme, gran, tu que manges jamai.

De blad! Que n'en fariès, ma fisto!

As ta fon melicouso e demandes rèn mai.

Que t'enchau l'ivèr! Ta famiho

A la sousto en terro soumiho,

Et tu dormes la som que n'a ges de revèi;

Toun cadabre toumbo en douliho.

Un jour, en tafurant, la fournigo lou véi,

De tu magro péu dessecado

La marriasso fai becado;

Te curo lou perus, te chapouto à moucèu,

T'encafourno pèr car-salado,

Requisto prouvisioun, l'ivèr, en tèms de neu.